Засгийн газрын ээлжит бус хуралдаанаас гарсан шийдвэрийг танилцуулж байна. /2021.06.29/
- Засгийн газрын өнөөдрийн хуралдаанаар эрүүл мэндийн салбарт санхүүжилтийг нэмэгдүүлэх төсвийн тодотголыг хэлэлцэж, УИХ-д өргөн барихаар болсныг мэдээллээ.
- Мөн айл, өрхийн орлогыг нэмэгдүүлэх зорилгоор хүүхэд бүрд олгох 100,000 төгрөгийг он дуустал үргэлжлүүлэх тухай төсвийн тодотголд тусгасан, айл өрх, аж ахуйн нэгжийн цахилгаан, дулаан, ус, хог хаягдлын төлбөрийн хөнгөлөлтийг он дуустал олгохоор төсвийн тодотголд тус тус тусгасан.
- Эрүүл мэндийн салбарт нэмж 700 тэрбум гаруй төгрөгийн санхүүжилт олгохоор тусгасаны дагуу халдварын улаан бүсэд ажиллаж буй эмч, ажилчдад нэг удаа хоёр сая төгрөг олгох, мөн улаан бүсэд ажиллаагүй ч эрүүл мэндийн салбарт ажиллаж байгаа эмч, ажилчдад нэг удаа 1 сая төгрөг тэтгэмж олгох, мөн улаан бүсэд ажиллаж байгаа эмч, ажилчдын цалинг 50 хувиар нэмэгдүүлэх төсөл өргөн барихаар болжээ.
- Нийтээр тэмдэглэх баярын болон тэмдэглэлт өдрүүдийн тухай хуульд Үндэсний их баяр наадмаар 11-15-нд амрахаар заасан байдаг бол энэ жилийн наадмаар долдугаар сарын 16-ны Баасан гаригийг долдугаар сарын 24-ний өдөрт шилжүүлэхээр Засгийн газар шийдвэрлэлээ.
- Ингэснээр наадмын үеэр ес хоног амарна. Энэ хугацаанд иргэдийн хөдөлгөөний нягтаршлыг аль болох бууруулах, иргэдийг гэр бүлийн хүрээнд амрах нөхцөлийг бүрдүүлэхийг хэллээ.