Эдийн засгийн өсөлт, төрөлжилт, техник технологийн хурдацтай хөгжил, цаг үеийн нөхцөл байдалтай холбогдуулан жижиг, дунд үйлдвэр, үйлчилгээ эрхлэгчдэд үзүүлдэг санхүүгийн болон санхүүгийн бус дэмжлэг, үйлчилгээний тогтолцоонд зарим өөрчлөлт оруулах шаардлага тулгараад байгаа билээ. 

Жижиг, дунд үйлдвэр, үйлчилгээг төрөлжүүлэн хөгжүүлж, өрсөлдөх чадварыг сайжруулах, ажлын байрыг нэмэгдүүлэх, тэдгээрийн эдийн засагт эзлэх хувь оролцоог дээшлүүлэх зорилго бүхий “Жижиг, дунд үйлдвэр үйлчилгээг дэмжих тухай хууль”-д нэмэлт өөрчлөлт оруулах үүрэг бүхий ажлын хэсэгт “Баялаг бүтээгчдийг дэмжих холбоо” орхоор болов. 
Ажлын хэсэгт тус холбооны Удирдах зөвлөлийн гишүүн, Эрхзүйч Б.Батдэлгэрийг оруулахаар Удирдах зөвлөл шийдвэрлэж, саналыг хүргүүллээ.

Б.Батдэлгэр нь 2018 оноос 2020 он хүртэл ББДХ-ны Гүйцэтгэх захирлаар ажиллаж байсан бөгөөд ХХААХҮЯ-ны сайдын 2019 оны тушаалаар ЖДҮХС-ийн төсөл сонгон шалгаруулах журам боловсруулах ажлын хэсэгт ажиллаж байсан туршлагатай. Мөн 2020 оны 10-р сараас эхлэн ШӨХТГ-ын даргын дэргэдэх Иргэний зөвлөлийн гишүүнээр сонгогдон ажиллаж байгаа бөгөөд Баялаг бүтээгч, бичил, жижиг дунд үйлдвэр, үйлчилгээ эрхлэгчдийн эрх ашгийн төлөө, төрөөс олгож буй нэн хөнгөлөлттэй зээлийг зохих эзэнд нь очдог болгох, хууль бус зээл олголтын эсрэг тууштай тэмцэж, хяналт тавьж  ирсэн. 

Дашрамд дурьдахад 
“Баялаг бүтээгчдийг дэмжих холбоо” ТББ нь 2015 онд нийгмийн шаардлагаар үүсэн байгуулагдаж, Баялаг бүтээгч, ЖДҮ, үйлчилгээ эрхлэгчдийн эрх ашгийг хамгаалах, тэдний дуу хоолойг шийдвэр гаргагч нарт хүргэх, хэрэглэгчдийн дунд үндэсний үйлдвэрлэлийн бараа, бүтээгдэхүүнийг хэрэглэж хэвших үзэл санааг түгээн дэлгэрүүлэх зорилготойгоор үйл ажиллагаа явуулж байна. 

 “Жижиг, дунд үйлдвэр үйлчилгээг дэмжих тухай хууль”-д нэмэлт өөрчлөлт оруулах үүрэг бүхий ажлын хэсэгт “Баялаг бүтээгчдийг дэмжих холбоо”-ны төлөөллийг оруулж байгаад талархал илэрхийлье.  “ЖДҮҮ дэмжих тухай хууль”-д нэмэлт өөрчлөлт оруулах үүрэг бүхий ажлын хэсэгт “Баялаг бүтээгчдийг дэмжих холбоо” орж байгаа нь жижиг, дунд үйлдвэр эрхлэгчдийн эрх ашгийг хамгаалах, дэмжлэг болохуйц заалтуудыг оруулахад томоохон хувь нэмэр болно.