Энэ сарын 10-наас иргэн, ААН-д олгож эхлэх ажлын байрыг дэмжих зорилготой гурван хувийн хүүтэй зээлийн талаар Сангийн яамнаас танилцууллаа. Зээл хүсэгчдэд тавигдах шаардлагыг хүргэж байна. 

Иргэнд: 

50 хүртэл сая төгрөгийн, гурван хувийн хүүтэй зээлийг бичил болон өрхийн бизнес эрхлэгч, ажлын байр бий болгогч иргэнд олгоно. 

Аж ахуйн нэгжид: 

ААН-д тавигдах гол шаардлага нь НӨАТ төлөгч байх. И баримт системд бүртгэлтэй НӨАТ төлөгч байгууллагад 500 сая хүртэл төгрөгийн зээл олгоно.

Зээлийг зориулалтын бусаар ашигласан тохиолдолд: 

Ажлын байрыг дэмжих зорилготой уг бизнесийн зээлийг зориулалтын бусаар ашигласан, дамжуулан хүүлсэн тохиолдолд гурван хувийн хүүтэй зээлийг тухайн банкны арилжааны зээл рүү шилжүүлнэ. 

ЕРӨНХИЙ НӨХЦӨЛ

Зээл олгох хугацаа:

• 2021 оны 12 дугаар сарын 31-ний өдөр дуустал

Зээлийн дээд хэмжээ:

• 500.0 сая төгрөг

      Нэг зээлдэгч, түүний хамаарал бүхий этгээдэд олгох зээлийн хэмжээ/“Хамаарал бүхий этгээд” гэж тухайн аж ахуйн нэгжийн хувьцааны 50 ба түүнээс дээш хувийг эзэмшдэг хүн, хуулийн этгээдийг/

Зээлийн зориулалт:

• Эргэлтийн хөрөнгө
• Цалин, түрээс, Үндсэн хөрөнгөөс бусад хөрөнгө, түүхий эд материалыг санхүүжүүлэх

Зээлийн хүү:

• Жилийн 3.0%

Зээлийн хугацаа:

• 36 сар хүртэл

Үндсэн зээлээс чөлөөлөгдөх хугацаа:

• 12 сар  хүртэл

Батлан даалтын хувь:

• 60 хувь хүртэл

Батлан даалтын дээд хэмжээ:

• 300.0 сая төгрөг

Батлан даалтын шимтгэл:

• Батлан даалтын дүнгийн 1% /Зээл олгоход нэг удаа авна/

ЕРӨНХИЙ ТАВИГДАХ ШААРДЛАГА

Нэмэгдсэн өртгийн албан татвар суутган төлөгчөөр бүртгүүлсэн, эсвэл нэмэгдсэн өртгийн албан татвараас чөлөөлөгдсөн байх /Татварын ерөнхий газар, Нийгмийн даатгалын ерөнхий газрын лавлагаагаар тодорхойлно/

Банкнаас зээлийн үйл ажиллагааны журам, зааврын хүрээнд энэ шаардлагыг хэрэгжүүлэхтэй нийцэж тавигдсан бусад шаардлага

Батлан даалтын шаардлага:

• Жижиг, дунд үйлдвэр, үйлчилгээг дэмжих тухай хуулийн 4.1.1 дэх заалт, 7.1 дэх хэсэгт заасан шаардлагыг хангасан байх / ЖДҮҮДТ хуулийн дагуу тодорхойлсон үйл ажиллагааны  цар хүрээ, үйл ажиллагаа эрхэлдэг аж ахуй нэгж байх/
• Зээлдэгчийн зээлийн барьцаа хөрөнгө хүрэлцэхгүй байх /Батлан даалттай зээл хүсэгч аж ахуйн нэгжийн өмчлөлийн хөрөнгө болон тухайн аж ахуй нэгжийн 50 ба түүнээс дээш хувийн хувьцаа эзэмшигчийн өмчлөлийн хөрөнгийн нийлбэр хүрэлцэхгүй байх/

НИЙТЛЭГ АСУУЛТ, ХАРИУЛТ

1.    Ажлын байрыг дэмжих зээлийн батлан даалтад хувь хүн хамрагдах боломжтой юу?

• Ажлын байрыг дэмжих зээлд Жижиг, дунд үйлдвэр, үйлчилгээг дэмжих тухай хуулийн 4.1.1 дэх заалт, 7.1 дэх хэсэгт заасан шаардлагыг хангасан ААН хамрагдана. Хувиараа бизнес эрхлэгчид арилжааны банканд хүсэлтээ гаргана.

2.    Ажлын байрыг дэмжих зээлд хамрагдаж байгаа ААН-үүд бүгд Батлан даалтад хамрагдах уу?

• Зөвхөн зээлийн барьцаа хөрөнгө хүрэлцэхгүй ААН-үүд батлан даалтад хамрагдана.

       /Батлан даалттай зээл хүсэгч аж ахуйн нэгжийн өмчлөлийн хөрөнгө болон тухайн аж ахуй нэгжийн 50 ба түүнээс дээш хувийн хувьцаа эзэмшигчийн өмчлөлийн хөрөнгийн нийлбэр хүрэлцэхгүй байх/

3.    Заавал ЖДҮҮ эрхлэгчийн тодорхойлолттой байх шаардлагатай юу?

• ЖДҮҮ эрхлэгчийн тодорхойлолт шаардахгүй.

4.    Батлан даалтад хамрагдах бол Зээлийн батлан даалтын санд хүсэлтээ гаргах уу?

• Эхний ээлжид арилжааны банкандаа хандаж  хүсэлтээ гаргаж зээлээ судлуулна.

5.    Ямар банканд хандаж зээлээ судлуулах вэ?

• Арилжааны бүх банкнуудад хандаж зээлээ судлуулах боломжтой.

6.    Ажлын байрыг дэмжих зээлд хамрагдаж Үл хөдлөх хөрөнгө, ажлын байр худалдан авч болох уу?

• Зээлийн зориулалтын хувьд зээлдэгч ажлын байраа хадгалах, бизнесийн үйл ажиллагаагаа тогтвортой явуулахад шаардлагатай эргэлтийн хөрөнгө (ажилтны цалин хөлс олгох, түрээсийн төлбөр төлөх, үл хөдлөх хөрөнгөөс бусад үндсэн хөрөнгө, түүхий эд материал авах)-ийг бүрдүүлэх дэмжлэг үзүүлэх юм.

7.    Давхар зээлтэй байж болох уу?

• Үйл ажиллагааны орлого нь зээлээ төлж чадахаар бол болно.

8.    Огт барьцаа хөрөнгөгүй хүн зээлд хамрагдах боломжтой юу?

• Зээлийн батлан даалтын сан зээлийн 60 хүртэл хувийг батлан даах учир зээлдэгч хамгийн багадаа 40 хувийн барьцаа хөрөнгөтэй байх ёстой.